2Cor 13 | ATA | STEP | Ano 'o ne, xixao noxilo ulai uoxinge tatalusou. “Mimii ukalusi ne uxali manina loxo ta mitema ta tamei uasi ia tatalu imaisou mo mia'aloxu,” loxo Lavuku Tavuna teinu mulemolu.

a 13:1Lap 19:15; Mat 18:16; 1Ti 5:19

b 13:4Pil 2:7-8

c 13:51Ko 11:28

d 13:102Ko 10:8

2 Corinthians 13

Vaikala sou Tololovo Kaluxusou Noxou Paulo

1 ^aAno 'o ne, xixao noxilo ulai uoxinge tatalusou. “Mimii ukalusi ne uxali manina loxo ta mitema ta tamei uasi ia tatalu imaisou mo mia'aloxu,” loxo Lavuku Tavuna teinu mulemolu. 2 Vaikala sou tololovo ano 'o ne eni elosinge no mine eni exixao elai noxinge alaxu tameisou ne. Vaimomo 'o eni axolu va'axu 'o ia avikala la. Xo no anu lai noxilo la atalosi'a ane'i ane misusu tei ne mo mose'i la, 3 xo loxo ngamasaxa sou apala'alixu Kalisito lexe Anu molu uvikala noxilo. Anu ne loxo mamalaxu sou uxaxaisinge uasi, ia anu ne pekia'u misevile noxinge ne. 4 ^bXo loxo sou talavusou manina la anu ne mivau musoli no anu ovu valautu ne no mine Anu mamalaxusi. Ia Anu uxolu mauli no anu xavi tatila noxou Lataua. Aloxo nesi la nexi ne mamalanexe noxou, ia no anu xavi tatila noxou Lataua la nexi taxolu tamauli noxou sou taxaxaisinge.

5 ^cIoxe iengi umulingengi la sou ngamaisinge lexe loxovaa ngingi ngexolu no anu mulamulaxu tangengi, menge ngatovongengi la. Loxovaa ngingi ngalavu lexe Kalisito Iesu anu a uxolu noxinge ne uasi? Ia lexe, manina uasi la ngingi ngapolopepee pamauli ne. 6 Mo eni emulaxu taleli lexe ngingi ne ngalavusou lexe nexi tapolopepee pamauli ne uasi. 7 Ioxe vaimomo 'o nexi takilaka noxou Lataua lexe ngingi nga'oxonu mii vile ususu mamu. Anu sou loxo ta mitema imaisou lexe nexi teno'u pamauli nesi uasi. Mo ane'i imaisixe la nexi loxo tapolopepee pamauli ne ia ngingi ne nga'oxonu mii ma'ia ane mu'isalilisi. 8 Nexi taxaxai sou vaikala maninasi, ia tamomomo sou ta'oxonu mii vile sou utaluxu uasi. 9 Nexi ne ta'osa no voxovoxo ane nexi mamalanexe ia ngingi ne pekia'inge. Mo lakilaka noxixe ne singe sou lingamongenge noxou Kalisito. 10 ^dAnu tava'u aloxo ne la sou eni exolu va'axu ia ekaukavunu mimii ano'o ulai noxinge, mo sou no mine eni ane'e la umomomo sou a'oxonu su'u nonginge no anu xavi 'o mamu. Xavi ane Tila mulosilo ne sou umamulongengi ngalu'e uasi ia utulusinge pekia'u.

Sexesexela Kalukalusou

11 Kaluxusou la ta vivilo, 'osa'osa ulai noxinge lexe xavingengi sou lingamongenge noxou Kalisito. Ngalomu no anu peletoto noxilo, nga'oxonu xavutalamengi uxali vilesisi, mo ngaxolu no anu opo se'isisi. Mo sou tanutanuxu noxou Lataua mo opo se'isisi noxou umomomo sou uxolu noxinge.

12 Ngasexelangenge ngatongato'o mo ngatimunu xalengengi no 'a 'osa'ila noxou Lataua. Ta mitema noxou Lataua ukalusi isovanu sexela noxi'a une'e noxinge. 13 Eni akilaka lexe umomomo sou alauna noxou Tila Iesu Kalisito mo tanutanuxu noxou Lataua, xe noxou Uleenu Tavuna uxolu noxinge ukalusi.